Sagovornici

I lisica može biti teška 350 kilograma

Jul 26, 2020 4 Komentara

(15 riječi)

Grbljani su poznati kao dobri lovci i ribolovci. U julu prije 15 godina, Nikola Lazarević iz Bigove je ulovio morsku lisicu, tešku 350 kilograma, dužine 5,20 metara, što je rekord na našim prostorima, pa i šire na Jadranu, kada je u pitanju ova riba. Nikola je poznati ribolovac iz tog mjesta. Osim ovih rekordnih 350 kilograma, najteža tuna koju je ulovio bila je 104 kilograma, kernja 75, sabljarke od 30-60. O ostalom ulovu da i ne pričamo, to spada u grupu sitnijeg.

Novinar  Budimir Bućin

.............................................................................................

        Nikola od stare slave se ne živi, teško je ponoviti ono što ste vi uradili prije 15 godina ?

         To vam je tačno. Ta morska lisica je neobična riba. Teško se lovi, ali porodična tradicija je nastavljena. Moj otac je ulovio jednu bila je manja, mislim težine oko 200 kilograma, to znači u odnosu na ovo vrijeme prije više od 20 godina. A ovo "čudovište" sam ulovio par metara od Prevlake na dubini, tačno ću vam reći 132 metra, jer imam instrumente koji mjere. Bio sam nepripremljen, mislio sam ko zna što vučem, neki torpedo. Naša je procjena da je bila teška oko 350 kilograma, jer osmorica smo se borili sa njom da je izvadimo iz vode i donesemo do kuće. Tek kada smo je "pretvorili" u komade izmjerili smo. Dužina je bila 5,20 metara.

      Kad ste  je vidjeli jeste li znali koja je to riba i ima li  opasnosti ?

          Pa ona je dijelom pocijepala mrežu, ali borili smo se gdje da taj plijen ispustimo. Ja sam sa iskustvom, znao sam koja je vrsta ribe. A i treba biti oprezan, ima riba koje znaju da budu izuzetno agresivne. Spustio sam se iz barke, uzeo kožnu rukavicu, provukao kroz škrge konopac debljine 12 milimetra. Uspjeli smo da je vežemo za barku, na obali je bilo oko 20 ljudi koji su se čudili i gledali što je to. Nije bilo lako nas osmorica smo se borili da je izvučemo.

            Bilo je to blizu Prevlake, Crnogorka ili Hrvatica ?

      Ona nije znala reć, a nije za ovih 15 godina bilo reakcije. Neka bude da je Crnogorka. Nije bilo daleko od granice. Da ne bude medjunarodni incident.

               Pomaže li neko?

      Unučad su zainteresovana, makar su mi moralna podrška.

                        

       Je li ovo najveća kilaža, i dužina ribe, koju ste ulovili ?

      Jeste to je tačno. Lovim ja i ostale ribe, ali to je neka druga specijalnost. Moja najveća ulovljena sabljarka je bila 94 kilograma, nekoliko dana nakon ove lisice. Ajde, ali da ne ispadne da se hvalim, tunu sam ulovio sa 104 kilograma, kernju 75 sve su to veliki ulovi. Ovog "sitnijeg" ima bezbroj.

                    

                 I gdje sva ta riba završi? 

    A znate kako, imam restortan, tu se pojede dosta. Imam prijatelje, kumove, podijelim, ima se od čega. Naravno spojio sam i korisno i lijepo. To zadovoljstvo teško se može platiti. Nemojte misliti da se često ovako nešto ulovi. Imao sam sreću da iz mreže, ili sa udice nijesu dosad bježale one teže ribe.

                             

        Vi imate restoran, koju vrstu ribe najčesće traže gosti ?

          Ima dosta vrsta ribe, ljudi znaju izbirikali su se. Ali svi oni znaju da je to riba koja je ulovljdena u moru, nije tovljena i uzmu maltene bilo koju: škarpinu, san pijero, zubatac, kernju, sabljarku, sarag ...

                    

                  

       Hvala vam pa da budemo talični da  i ovoga ljeta  ulovite nešto slično kao prije 15 godina.

          Nije svaki dan Badnji dan. Hvala vama, kad god dodjete biće ribe kakvu zaželite.